CNDP Chin National Democratic Party (CNDP) General Assembly Hakha Ah A Sai U

CNDP အေထြေထြညီလာခံကို ဟားခါးတြင္ျပဳလုပ္စဥ္

Yangon, April 27

Chin National Democratic Patry (NDP) he kawl awl la ခ်င္းအမ်ဳိးသားဒီမိုကရက္တစ္ပါတီ a mingna. Chin thlangphun ham aka pai party la awm tih Lairam (Chin Land) ah byng myhla Sagaing ram khui, Magwe ram khui, Rakhine ram khuiah aka awm Lai thlaang (Chin People) ham aka pai party la awm tila zakmingna awm. CNDP kah 2015 kum General Assembly he 31^st March, 2015 kalawng 2^nd April, 2015 khui hin thum hil Hakha khawpui, HBA, Strait Hall ah a sai u tila zaak la awm.  General Assembly ah CNDP kah CC member on CECthli, MPthli, Township (Myone) kah party committee memberthli boih thlang (80) kai u. Assembly ah Central Committee member thlaang 80 a tyk u congah Central Executive committee member (CEC) thlaang 41 a tyk u. CEC Chairman la Tedim kah Pu Zozam @Zam Cin Pau , Vice Chairman 3 a tyk u tih Matupi kah U Lian Kye, Mindat kah U Ling Hung , Hakha kah U Siang Mang a tyk u. General Secretary la Matupi kah U Dai Thung a tyk u. Joint Secretary 3 a tyk u tih Salai Ngepi (Falam), Salai Ceu Bik Thawng (Thantlang), Salai Myo Chit (Kanpetlet) he hy he a tyk u.

Chin ram khui Party Committee, Sagaing ram khui committee, Rakhine ram khui committee khaw tyk la awm.

CNDP Party he Lai ram (Chin Land) ah township  (Myone) pa 9  ah boih pai tih Sagaing ram khui, Rakhine ram khui cong ah Magwe ram khui ahkhaw party pai la awm. 2015 General Election (ေ႐ြးေကာက္ပဲြ) atah Lai ram ah ျပည္သူ႔လႊတ္ေတာ္ hyn 9, အမ်ဳိးသားလႊတ္ေတာ္ hyn ah 12, ျပည္ယ္လႊတ္ေတာ္ hyn ah 18, boih ah 39 congah Sagaing တိုင္းေဒသႀကီး ah ခ်င:္တိုင္းရင္းသားေရးရာဝန္ႀကီး hyn on atlotlo boih ah hyn 11, Rakhine State ah ခ်င:္တိုင္းရင္းသားေရးရာဝန္ႀကီး hyn on atlotlo ah hyn 9, Magwe တိုင္းေဒသႀကီး ah တိုင္းလႊတ္ေတာ္ကိုယ္စားလွယ္ hyn pa 1, boih ah MP 60 hyn ah MP huh ham thaa ka hyyr u ai tila zaak la awm.

A ngaihna u kok tah CNDP lawng Chin State ah MP zahawh huh ham on Chin Government (ခ်င္းအစိုးရ) ah hut lawh ham a kamthlahna awm, ti u. Tahe ah CNDP ah လႊတ္ေတာ္ကိုယ္စားလွယ္ MP 11 awm tih Chin Party khui boihah aka bou kokla awm tila zaakna awm. 2015 kum meet sangna ah taana ham Committee Member 17 khaw a tyk u bal, tila zaak la awm.

Bagladesh Ram ah Thlaang 10 A Til U Mat.

Bangladesh ram khawpui Dacca tengah aka awm Brama Putra tuiva keengah Hindu pathen aka bawkthli thlaang a zahawh aih dawngah til la til u the tih thlaang paha tah mat a til u. Bawkna ben tuhkai u tih ciimcaihna hamla tui a thluk u vengah khat on khat til u the. Police kah thuina ah huta pasarih dyk tih tawngpa pathum dyk tila a thui. Te ah aka awm mik on aka hu thlaangthli lawng atah thlaang 50 dyk tila a thui u. Brama Putra tuiva ah kum rook ah Hinduthli lawng amamikah bawkna on tuhkai u tih ciimcaihna tui a thluk u popa. Bangladesh ram ah thlaang 160 million awm tih te khuiah Hindu aka bawk thlaang 16 million awm.

(March 28, 2015, AFP)

Kum 40 Khui Tawngpa la Sa u Tih A Ca Aka Cawm Izip Nu Laksawng A Dang

Izip ram ah huta khat tah a va a dyk congah a canu cawm thaina hamla kum 40 khui tawngpa la sa u tih bi a bi congah a canu a cawm, tila Xinhua awlthang lawng a phawng. Kum 65 aka law pon Nu Sikagaba Adubu tah Luzau khaw ah thlaang boih a ming. Ryng hin ah a hawna u Nuthli kah Khawhin ah ca aka cawm thaikok nu la tyk la awm tih, Izip president Abdel Fata-El Sisi lawng Bawipa hin ah ahih te oot hamkoih huta theen kokla a tyk. Te dawngah America Dollar $6500 laksawng a peek. A bung khuiah camo a awm hyn vengah a va lawng a dyk taak. Te dawngah huhai la awm. 1970 kum kalawng Izip ram ah hutathli bibi thaina bran lawng a khang dawngah ahih te a sam a vaawk, tawngpa kah khaw-aawk hinaak a naak tih tawngpa angla bibi a tlap. Phanat aka meet, im aka sa, mirang lai aka pyn, laithawl ben bi soprep te tawngpa angla a bi. Tekah a bibina on a canu te seeel thlaang la a coong sak. “Ka va a dyk congah, va tlo ka sa tlaih nawh. Ka canu hamla nu on pa la bawk ka awm. Bi soprep ka bi. Aka rih tangkiik miraang lai khaw ka dong. Kut ka dyyn vaai nawh. Bi soprep ka sai,” tila a thui.

(March 25, 2015, Xinhua).

World Evangelical Alliance (WEA) on UN Secretary General Ban Ki-moon Huh Ahih

Bishop Efraim Tendero, WEA Secretary General, with Mr. Ban Ki-moon, Secretary General of the UN. (Photo: UN)

New York, NY - March 12, 2015

World Evangelical Alliance kah General Secretary Bishop Efraim Tendero on United Nations Secretary General Ban Ki-moon  tah UN Headquarters, New York ah bi haih thai hamkoi awlka thui hamla ngawlhtunna a khyh hih. Tekah ngawlhtunna ah thlanghing theekhaa patang sakna, khawdeng tangkiikthli on bawkna laklaw ah zakmingna khyh thaina ham, diklai he atheenla byhthawng kawng Bishop Tendero lawng a thui. Bawkna ming hawna on thlanghing theekhaana, ngawnnathli diklai dawngah awm hang tih khat on khat laklaw ah upvotna, rihna awm hang. Diklai thlanghing awmtheenla, ading asyykla khaw sak rip thaina ham United Nations on World Evangelical Alliance laklaw ah zakmingna, bibi haih thaina a thui hih. 

Tharui Tlawh Hoihkhangna 9

Thirui khuiah thi a ceh thaina nawh hamla aka kanghalh thaihu (thau) a awm dawngah tharui tlawhna (atherosclerosis) va awm. Thirui khuiah thi hor hor ceh thai myhla asan a awm atah bawng tlawhna (heart attack) nawh atah pum khaawnna (stroke) a awm sak tih ahula tah dykna la coong.  Thirui khuiah thi ceh thai nawh dawngah tlawhna la aka coong thlaang zahawh lawng a ming tah raang tlawhna (angina) he ni. Hetila raang tlawhna hetah baawng khuiah thi anepla a ceh thai nawh dawngah aka awm tlawhna la awm. Thi ceh thai nawh dawngah aka awm atlo tlawhna bal tah, hiil otna, pum kekvaang hitna on baawng tlaaina heni.

Tlawhna Aka Coong Sak Thaihuthli

• Sarawh aawkna
• Thau sohna
• Zun didipna
• Thi phulna, saangna
• Cholesterol saangna
• Pum cawlhtatna khyh nawh
• Atlo tlawhna dawngah phingna, ruhcawng phingna.

Tlawh Nokna

Raang tlou.

• Pum kekvaang hit.
• Kut khaw rih dutthlut
• Hiil ot
• Baawng tlup tlup tlaai
• Baawng tlyyk u
• Thaa boih, thaai sai nawh
• Laawk kaw huutna
• Soutui pawk pawk baw
• Kaa tui nawh (Buh an hyy ngaihna awm nawh).

A sawkah tlawh nokna khat khat mai aw na khyh atah sibawi tengah cet langtah anepla thui peh.

Hin rook na awm ihna dawngah thawlengna adang kah thui angla na sai atah baawng tlawhna on tharui tlawhna hoihkhang ai. Hin rook ah ngawlh sut mailai myhla cawlhtat popa tih caak aawk na ngaaithyyn congah sarawh na aawk nawh atah na tlawhna hoikhang zozah ai.

Tharui Tlawh A Hoikhangna 9 

1.      Tuidingna ah aka awm ngaa ngan, thuina maiah salmon nga, sardines, mackerel, he ang ngaathli, mah tuiva kah ngathli he caak atah cholesterol on thauthli a zawl sak tih baawng sa a ding sak. Azawl kok ah zarh khat ah ngaa vaihih na caak hamla awm. An ram on dam lang tah cah.

2.      Rut tang thaih he phingna a hoihkhang sak tih raang tlawhna a khang congah baawng tlawhna a hoihkhang sak. Tuibe khawt khat rut thaih deng coi aziit ca khat, catii thaih tui azawl, khawitui azawl on piit langtah awh. Tetila zarh mezoh to nym hin at ah vaihih aw popa. 

3.      Chocolate aka myym he phing aka dip sak la awm. Chocolate dawngah fiber, iron, magnesium dat a awm dawngah thirui khuiah thau aka awm (atherosclerosis) a zawl sak. Te dawngah chocolate na lai atah aka mym ke lai langtah cah.

4.       Khasawn baawk he tharui tlawh hamla aka theen kokla awm. Thi ceh a theen sak, tlawhna mi a daam, cholesterol a zawl sak tih baawng tlawhna a hoikhang sak. Khasawm baawk amu pathum zunah kheng langtah vaitaw suktui khawt at on haih thawng langtah, kop na ding sak congah na ih tawm ah awh.

5.       Tamseen he anhawi la thlaang zahawh lawng a hawna u. Anhawi byngla hawna u tih kum 10000 veng kalawng tuisii la ana hawna u pon. Tamseen lawng thirui khuiah thi ceh a theen sak congah tharui tlawh a hoikhang sak. Tuibe bonglong khat khuiah coi ziitca dawngah tamseen khuiah sang. Te congah khawitui coi ziitca khui at sang bal. Te tui te hin at ah hihvoi aw popa.

6.       Catii Thaih he thirui khuiah thi ceh thaina hamla theen tih baawng tlawhna khaw a hoihkhang sak bal. Tuibe bonglong khat khuiah catii thaih khat tee suui. Khawitui bonglong ziitcakhat sak langtah bry vaai azawlca (ngazouhkawng thaih) thlaak thil. Te tui te hin at ah vai vih aw popa.

7.       Sungkeek he an baw aka tui sak on an aka tui sak anhawi la awm. Sungkeek lawng phing tlawhna a dip sak. Thi khuiah byi aka kuun khaw a khoo. Tuibe bonglong khat khuiah sungkeek deeng tangte coi aziitca khat ah thlaak. Te congah khawtui coi aziitca dawngah khui at thlaak thil bal. Buh na caak rook ah tetila na sai sungkeek tui bonglong khat aawk thil popa.1.       

8.       Kangling caang he thirui khuiah thi ceh aka kanghalh thauthli a caih sak. Te congah baawng tlawhna khaw a hoihkhang sak bal. Kangling caang buh la na thaawng congah nga ngan dam langtah cah.

9.       Pomegranate thaih he mah khaw awm nawh. Tede pomegranate thaih dawngah vitamin C,E, on K a awm dawngah phing tlawhna a daam. Thirui khuiah thiceh aka theen sak nawhthli te a caih sak. Pomegranate thaih atui he hin at ah bonglong khat aw popa.


Caak nawh Hamkoi.

 Lawngteng kah buh an zoihthli, akeuthli, sai patong caakkoithli 

Ca bol, na ca na nauthli cah bol.

Meh haai langtah ca bol.

Sarawh aw bol.

Zu aw bol.

Mikhai varphong la khyh popa.

        

Thlangmi 150 Germany Vansawng (Germanwings A320) France Ram Alps Tlangsang ah Tla Rup

Thlangmi 150 aka phui Spain Ram Bacelona kalawng Germany ram Degsedort khawpui la a sawng Germanwings A320 tah March 24 hin thlemben khawnok lung 10:30 zunah Alps tlangsang France ram ah tla rup tila Daily News lawng a thui .

Tekah vansawng aka mawng pilot 2, vansawng kah bibithli 6, on kamzin 142 boih dyk.Kamzin 142 khuiah Spain thlaangthli 45, Germans sengcamothli 20 on ram tlotlo kah thlaangthli thum tila zak la awm. Aka syng on aka hing awm nawh.Vansawng khaw phengpheng tlang dawngah de u.Tu dawngah hetila a tlak kai ti he ming la awm thlan hyn. 

(Sky Net News)

Singapore Kah Lamhacyk President Mr. Lee Kuan Yew Dyk

Mr. Lee Kuan Yew

Ziitca tih  ngahawikungthli byng a awmna vangca kalawng diklai dawngah aka roong kok aka ciim kok la aka coong Singapore ram aka roong sakkung Lee Kuan Yew tah (September 16, 1923-March 23, 2015) vengah dyk pon tila International News lawng a phawng.

Mister Lee Kuan Yew he British kut khui kalawng Singapore amah pok pathaina ham thaa aka hyr tih aka paisakkung la awm. Mr. Lee he “coong thai tang nawh my” tila thlaang lawng a pokna kalawng coong sak thai hamla thaa aka hyr kok  ram ukkung bawi la awm. Singapore ram tah a diklai khuiah tu thaihu khaw awm nawh tih tui lawng boih a rii. A ram kah thlangthli khawdeng tangkiik. A zahawh ngaai tah ngahawina on bung a khuut u.

Kawdeng ram kalawng ram a roongna ham la 1954 ah People’s Action Party (APP) a tawng.  June 5,1959 ah lamhacyk prime minister la awm. 1990 ah Prime minister kalawng dym tih Mr. Go Chuat Tong teng ah bibi a peek. 1990 - 2004 to Senior Minister a bi. 2004 - 2011 to ah Minister mentor a bi bal.

Ahih kah bibina rangon taknawng, laikhu, tangtarang ada kokna ram kalawng aka ciim bok, aka roong kok Singapore ram la a coong sak. Thlaang khat kah tangka huhna aka zahawh kok ram la awm sak. Ukna benah, thlangreen khaw ngaaina  benah, thahyrna benah haai  aka cawh thlaang la awm. Diklai pum kah ukkung mingthangthli lawng haidamna kawtheena rip a khyh u. Rawksawt la USA President Obama on Clinton on atlotlo kah ukkungthli cet u. A pum tah diklai la coong pon suide a bibina (Singapore) tah dilai a bot thlan to thlaang lawng a huh veng hilh thai tang nawh my. (Adapted from Democracy News Paper, March, 2015)

Boxing Mingthang Rawi Floyd Mayweather on Manny Pacquio Thawng (Bop) Lohlangna

Diklai dawngkah thawng lohlangna boxing ah asang kok ming aka thangrawi America ram kah boxing mingthang, tahe to thawng (bop) lohlangna ah vaai khaw aka sung thlan Floyd Mayweather on Asia ram kalawng Dilai kah mingthang Boxing aka thom tih Pathen benah cadah harah on huhai tumtee aka bawm Philippine tawngpa tang  Manny Pacquio tah kum ruk khui thawng lohlangna sai ham a kamthlah hih hih congah May 2, 2015 atah Arena, Las Vegas, USA ah lohlangna thawng ahih ham awl a khyh hih pon. Tahe he rawi kah lohlangna poi he aphu aka tlou kok poi la a awm byng myhla thlaang zahawh lawng a ngaiyyp on byh ham a ngaih kok poi la awm ai. Tahe kah boxing lohlangna ah aka taa lawngtah  US tangka US $ 250 million a dang ai tila Sport News dawng ah a thui. 

(Skynet Sport News)

Lai Ram Hakha Khawpui Ah NBF Meeting Awm

NBF Meeting u vengkah  

Lai ram Hakha khawpui ah March 27 – 28, 2015 vengah Nationalities Brotherhood Federation (NBF) meetingna Hakha Baptist Association Hall ah a khyh u. Tekah meetingna ah Lai political partythli la aka awm Chin National Demcracy Party (CNDP), Asho Chin Party (ACP), Mara Ethnic National Development Party (MENDP), Khami Party (KP), Mro Party (MP), hehy he thuum u. Atlo ethnic national partythli tah, Shan, Kachin, Kaza, Mon, Rakhine, Dawei tila political partythli ahawmla 21 law u de, party 17 tah meeting kai thai u tih party 4 hy kai thai u nawh.  Meeting aka kai thlaang 50 law u. Hekah Federation lawng a kamthlahna tah 2015 meet sang vengah ethnic party (Kawl ram khui kah thlang pun ziit party boih) lawng meet zahawh dang tih acozah pai thaina hamla a kamthlana la awm. Hakha meeting a boih congah March 28 hin ah Thlanthlang khaw benla thuicaihna khyh hamla pahoi cet u. 

(Interview)

Ralkap on Bawng u Tih Constitution Tlaih Ham NLD Lawng A Thui

Aung San Su Kyi

2008 kum vengkah ralkap ukna huiah a sai u Kawl ram ukna upadi (Constitution) te tlaih kop tih asongla sai kop  hamla ralkap on National League for Democracy (NLD) ka bawng u the hamla  awm, tila NLD lawng Yangon khawpui Taw Win Hninsi Hall, Fascist Revolution Day (Tawhlan ze Hin) ah a phawng. National League for Democracy party on atlo political partithli, ethnic national partythli boih bawngzawng u the tih Aung San lawng a sai ram pum roproina, asongla ukteemna a awmna hamla 2008 kum vengkah Constitution he tlaih ngaikhok  hamla awm, tila a thui. Tekah Revolution hin vengah NLD Party maawtkungthli, politicianthli, ethnic national maawtkungthli on ram tlotlo kah diplomats (ramtlo laipaithli) thuum u. Tede Aung San Su Kyi tah sading nawh dawngah te hin ah thuum thai nawh.

(http:// Burmese dvb.no)

Kawl Ram Bibikungthli kah Thapang A Pung Sak

Kawl ram ukkung bawithli lawng ram khuikah bibikungthli caakawk awmihna on ram a roongna tare ham a kamthlahna awm tih tangka raanna kum 2015-2016 khuiah thapang pung sak ham March 25, 2015 kah awltlokna a khyh angla thapang a pung sak.

	Thapang Rym		Thapang Thai
1	75000 – 1000 - 80000	1	120000 – 2000 - 130000
2	81000 – 1000 - 86000	2	135000 – 2000 - 145000
3	87000 – 1000 - 92000	3	150000 – 2000 - 160000
4	93000 – 1000 - 98000	4	165000 – 2000 - 175000
5	99000 – 1000 - 104000	5	180000 – 2000 - 190000
6	105000 – 1000 - 110000	6	195000 – 2000 - 205000
7	111000 – 1000 - 116000	7	210000 – 2000 - 220000
8	140000 – 2000 - 150000	8	250000 – 4000 - 270000
9	160000 – 2000 - 170000	9	280000 – 4000 - 300000
10	180000 – 2000 - 190000	10	310000 – 4000 - 330000
11	200000 – 2000 - 210000	11	340000 – 4000 - 360000
12	220000 – 2000 - 230000	12	380000 – 4000 - 400000
13.	250000 – 2000 - 260000	13	500000

1.      Thapang rym kalawng thapang a thai a pungna kum kalawng kum rook apung (interest) pung ai.

2.      Ramtlo kahbibikungthli khaw asawkah thapang angla ramtlo tangka thawna rate angla  a dang van ai.

3.      Hekah thapang a pung he April thla kalawng adang pon ai, tila Myanma Alinn Daily News dawng tee la awm.

(Myanma Alinn Daily (March 27, 2015)

Ram Khui Raltukna Bot tih Roproina A Awm Pon Ham Awlthuina

Kawl ram thawlengna tang tang hamla ukna lungdang syym aka thawleng hamkoi meetsangna voh voh zooi hang pon. Te vengah ram khuiah raltukna khaw a bot pon tih roproina on ading asyykla ram khuiah pilnam khaw sak thaina ham thlaang oih lawng a lamtoon u. Te dawngah ropn awl thui hamla bran on ram khui raal aka thou 16 maawkungthli huhtun avai 7na tah Yangon khaw h a khyh u. Awlthui hamkoi abou 7, aziit 30 awm tih te khuiah abou 5, aziit 20 to tah cong u pon. Yangon khawpui ah ropna awl thui lii vengah Kawl ralkap lawng Kachin ram on Shan ram ah vaan ben on diklai ben kalawng tare tare kahna a sai he raopna awlthui aka kanghalhkung la awm, tila miphun ziit ben kah ropna awl aka thuikungthli lawng caawtna awl a thui u. Tede aka kangtang hyn thui hamkoi khuiah ukna ben (political) thui hamla awm hyn tih tekah awl te March 30 hin ah kop thui hamla awl a khyh u.

(7Day Daily News).

Meet Sangna Asongla Sai Ham

March 25 hin vengah Kawl ram khawpui Nay Pyi Daw kah Meet sangna Commission office hall ah Meet sangna ben chairman U Tin Aye lawng America ram Stanford University, ram tlotlo kah ukna ben cangna department kah Professor James Fearon on a hubaang thlaang 23 on ngawlhtun meetingna a khyh u. U Tin Aye lawngah, tahe kah aka awm hamkoi meet sangna he democracy kah lungdang syym la a awm dawngah, Hluttaw (MP) meetsangnathli, Political Partythli registration saina (Hmatpung tinna); Upadi dawngkah angla khawlcuui ham, meet sang congah awlpungna a awm vengah metila awl tlok ai tithli, asongla a awm thaina hamla ramtlo kah meetsangna benkah thlangcuihthli on bawmceem u thena, meetsang vengah ahyp thaihu awm myhla langza ah sang thaina, asongla meet sang thaina hamla a lawng a imthli sai lii la awm. Te congah meet sang vengah ramtlo kah thlaangthli lawng a huhthai hamla khaw a lawng a im ka sai u, tila a thui. Tekah meetingna ah meetsangna committee member U Myint Naing, U Aung Myint, Dr. Daw Myint Kyi, U Ngunt Tin, U Win Kyi, U Win Ko on U Tih Htun (secretary) khaw thuum u van. 

(Myanma Alinn Daily)

Tangha Caminpoi

Tukum tangha caminpoi tah March 11 – 18, 2015 Matupi, Lawngvaan on Cangbawng State High School ah a phi u. Lawngvaan ah sengcamo thawnghih thlai lawng a phi u tih Cangbawng ahkhaw te zoh zun lawng a phi u van bal. Zahawh ngaai lawngtah ka phi thai, tila a thui u de, English ka phi thai ngaai u nawh, tila rip a thui u.

Matupi Ham Power Line

Matupi khaw khui hamla likthik hai atheenla vaang thaina hamla power line si lii la awm. Kawl ram Pauk kalawng Kyauktu to power line tung po a ling hang pon. Te kalawng Mindat la patong, Mindat kalawng Matupi la po power line rui tou hamla kamthlah la awm. Matupi atah thii tung theen thlangthli ling la awm pon. Tekah power line saina hut aka lou tah Kawl ram kah Tower Line 7 Company lawng hut a lawh tih a sai la awm.

Matupi Khawpui

Matupi Vang Pakhat

Matupi khawpui khuiah tlakrawh im aka sa zahawh hang pon. Lawngvaan, Khoboi, Cangbawng vaang rook ah tlakrawh im bro nawh nawh a sak u. Zahawh ngaai tah thicung on tung a sai u tih (re-enforcement concrete) on a sak u. Thing phu a tlawh lat pon dawngah tlakrawh im sak hamla kamthlah u ngaai pon. China made Motor Cycle zahawh tangkiik tih accident khaw voh voh zahawh. Motor aka lai khaw voh voh zahawh hang. Khaw khui lawngpui coal-tar on a sai nawh dawngah laikhuu thui huut nawh. 

Thaihu Phu Tlou

Tui kak tih khaw tawm ah tui rai tangkiik. Batu khaw atah gallon 5 rubber pung khat ah K. 250.00 la a zoih u. Cadawng hula Lemro la tui thlu la cet u. tui a thlukna kungah March thla khuiah Zotung nu hulaca khat tah lunghaal a caawt dol, plong tih lungtou dawng a lu ngolh a bawh tih tui dawngah pahoi byyk thuk tih dyk. Aithlui khat ah K. 20000.00 a pha. Nga ah pot pahih ah K. 3000.00. Antam an banvang paat ah K. 500.00. Cangcang pheu khat ah K. 15000.00. Lakphak on muk khat K. 500.00. Meh on awk ngan cawi vang ah K. 6000.00 hin rook lai ham awm nawh. Thlaawng baal a reu cawi khat ah K. 4500.00 la a zoih u. Amlai bong (tlakrawh) K. 150.00; Cement bag khat 12000.00.

Lou Dawi U Tawm Pon

Matu ram kah thlaangthli he akuum ngaai tah lou aka ton thlaangthli la awm u. Vah daawi tawm la awm tih tuiva la nga aka haawithli, tui hawi raa sathli awm u. Khaw khatsut atah im lou a sak u tih hong u nawh. Lou aka ton nawh thlaang khaw voh voh zahawh hang pon. Khaw on mawl tawm khawmawng lawng a thiing. Valangpi on Cangtaak kalawng Batu cehna bawngkung, liktui on tawkma duup atah huiha awl on bahou awl zaak la awm hyn. Cangim pangaw cehna ben tah thlaangding ngaai pon. Tinglawng, Awkla ben kalawng Leiring la, Lalui la, Luivang la motor on azoicala cet u pon. Vangca khat kah pahaam khat lawng, “April thla thlakung kalawng tah peng tawm vah a dawi boih u pon ai he,” tila a thui. 

Matu Ram Thlangbol Tunpuithli

2015 kum khawhaal khuiah Matu ram thlangbol tlotlo lawng tunpui rip a hawna u. March thla khuiah Leisin khaw ah Apostolic thlangbol tunpui a hawna u. March 11-15, 2015 ah Christain Reformed Thlangbol tunpui 30na Hannie Memorial Center, Lawngvan, Matupi ah hawna la awm. Pastor Simon Peter (Cangbawng, Matupi) on Pastor Johan (Lemro hawt) ordination peek la awm. Probationary pastor khat (Cadawng Zion) lawh la awm. Evangelitthli lawng khaw tlotlo ah cangpuina a khyh u bal.

Matu Literature Association Meeting

Matu Literature Association (MLA) he bran lawng Registration No. P – PK / 0017 a peek tih Matu ca ben saina ah  zalpaw la bibi thaina la awm. Matu Literature Association Committee meeting tah March, 2015 vengah Hannie Memorial Center ah sai la awm. Matu ca cangna kawng dawngah dootleetna on Matupi khaw khuiah a u lawngkhaw amah kah awlka ca a cang thaina hamla bran tengah thui hamla awl a tlok u. Te congah Matu alphabet dawngah tlangpui ben on dootleetna khyh popa silang, roproila awlthuina khyh zozah sih. Alphabet khat la hawl u ngaikhok hamla haai benah thui u sih, tila awl a thui u. Tekah awlthuina ah Matu Cingtlang Baptist Association kah General Secretary Rev. Hai Lai Thang lawngkhaw haai benah rop u ngaikhok silang awl khaw common language la tahe kah Matu awl hawna he hawna u sih. Kaimi cingtlang ben lawngkhaw he ni ka ngaih u, tila a thui.

Matu Vernacular Teachers’s Seminar Sai Ham

Matu ca, awlka ben on atlo thaihu mingkauna hamla Matu Vernacular Teachers’ Seminar tah April 14-18, 2015 ah Hannie Memorial Center ah awm ai. Tekah seminar ah awlpui la cang hamla subjectthli tah International Phonetic Alphabet (Linguistics) on Matu Grammar; Basic Health Education (Sadingna); Women and Children Acts (Camaw huta ben upadi); Agriculture (Thingthaih rampu lingna ben); Diklai Byhthawng Kymkawlna ben (Caring for the environment); Thlanghing kah zalpaw thaihu saithaina benthli cang la awm ai. Tekah seminar aka kai hamla khaw rook kah sengim sazathli, Sunday School sazathli on pastorthli thlaang zakhat khy la awm. Seminar aka kaithli hamla sport shirt angki theen thlang rip, bag, caram on ball pen rip, peek la a awm congah hin rook buh cah la awm ai. Akhok anoon ceh awmna khaw peek la awm bal ai.

Matu Rural Christian Community Development Committee Tykna

Tangka phaisa tlapna ben on caak aawk, awm ihna ben roong van thaina hamla Matu Rural Christian Community Development Committee tah February 18, 2015 vengah Hannie Memorial Center ah sai la awm. Te committee ah aka thuum thlaangthli tah: 1. Rev. Dr. Chan Thleng (Director); 2. Rev. Peng Thang (Chairman); 3. Pastor Maung Thein (Secretary); 4. Rev. Simon Peter (Recording Secretary); 5. Rev. Pam Vak (Treasurer); 6. Pastor Pa Zawm (Leisin); 7. Pa Zung Ciim (Lalui); 8. Pa Awi Ning (Valangte); 9. Pa Boi Thang (Vangkai); 10. Pa Peng Thang (Thaiboi); 11. Pa Pa Zaw (Valangpi);  12. Pa Reng Tawm (Valangpi); 13. Pastor Thui Vong (Awkla); 14. Pastor Sawng Pai (Hnote); 15. Pastor Ngou Thang (Palarou) he hy he member la awm u. He kah committee tah thlangbol ben lawng sai la awm tih roongna ben thaihu sai aka ngaihthli, ca cangna benah aka thoomthli, rangpui theenna thaihuthli, Awlthang sainathli bawmceemna ben committee la awm. 

Matu Ram Khaw Rook Lawngpui A Pha Tawm

Matu ram khuiah aka awm khaw rook ah motor lawngpui a pha thaina hamla lawngpui deeng li la awm. Kawl ram ukna thawleng la a awm cong kalawng mezoh khaw a diu thlanah Chin ram khuiah motor lawngpui khaw rook a pha thaina ham bran lawng mengtengna a khyh tih lawngpui a deeng. Chin khawpui Hakha kalawng akaak ben Paletwa khaw to motor lawngpui puk sak hamla thaa a hyyr. Paletwa ben lawngpui tah Mudra Company, B1 Compny, Shwe Kasone Company lawng hut a lawh tih a deeng u. Mindat kalawng Matupi, Hakha kalawng Matupi lawngpui tah puk pon de, tahe kop aboula kauh sak li la awm. Matupi kalawng Lailenpi ben khaw lawngpui a pha pon. Matupi kalawng Paletwa cehna motor lawngpui deeng lii la awm tih puk tawm pon. Lawngpui a kau 28ft deng sakla awm. Kum 2015 khawhaal khuiah cong tih April 6 ah Matupi ah. April 8 ah Paletwa ah awngna poi khaw sai hamla kamthlahna awm. Khaw khat on khat tuhkaina lawngpui khaw deeng rip la awm tih khatsut khaw tah motor lawngpui khaw boih a pha pon.